مقال صحفي تكتبه : نرمين أبو سالم مؤسس جروب أمهات مصر المعيلات:
#قانون_الاسرة
الراجل يطلق الست ويمتنع عن الصرف على ولاده والقانون مايجيبش حقهم..
الست تتمرط مابين شغل ومحاكم وبرضو ماتقدرش تكفيهم فتتجوز راجل تانى يسندها..
يقوم الراجل الاولانى واخد العيال منها عشان اتجوزت..
تقوم الست ياتسيبله العيال فيقولوا عليها انانية وجاحدة ويلوموها..
ياتتمسك بالعيال فيقولوا عليها انانية وفاجرة ويحاربوها ..
ياماتتجوزسش وتقعد تربى العيال فالراجل يقعد يبيع ويشترى فيها والناس يقولوا عليها شمال وسهلة والمجتمع باكمله الا من رحم ربى يبصيلها بصة دونية منتقصة..
وفى الاخر الست ياخسرت ولادها ياشردتهم ياخسرت نفسها
و #كله_بالقانون
الراجل يطلق الست ويديها الامان…
وف مرة يغفلها ويخطفهم من استضافة ودية..
تقوم الست الصبح هوب تلاقى ولادها مش فى
حضنها..
الراجل يختفى تماما ويقطع العيال عن امهم..
تقوم الست تروح تعمل محضر يقولولها مافيش اب بيخطف عياله..
الست تفضل تلف كعب داير بين المحاكم والاقسام والمحامى العام والنائب العام ومجالس المرأة والجمعيات الحقوقية والاعلام وتمشى كل يوم فى الشوارع تدور على ابنها..
لو الست مش عارفة عنوانه يقولولها هااتيلنا عنوانه والا مش هنعرف نعملك حاجة..
ولو الست جابت عنوانه يقولولها مش هنقدر نكسر باب الشقة حتى لو ابنك جوا…
وتفضل الست كدة لحد ماتبيع اللى وراها واللى قدامها وتخسر شغلها وفى الاخر برضو ماتعرفش ترجع ولادها والعيال يتربوا من غير امهم..
و #كله_القانون
الراجل يطلق الست يطردها من البيت هى وعيالها باللبس اللى عليهم ويغير الكالون.
الست تعمل محضر تمكين وموت ياحمار عشان تعرف تدخل الشقة تانى ولما تدخلها بعد ماتتمرط شوية حلوين فى الشوارع دة لو عرفت تدخلها اصلا يقوم يبيع الشقة بعقد صورى لواحد ويأجرها منه وبعدين يقوم يقوم اللى اشتراها كدة وكدة يطرد اللى فيها (اللى هما الام وعيالها) عشان الراجل اللى مأجر اللى هو طليقها مادفعش الايجار
و #كله_بالقانون
الراجل يطلق الست ويمتنع عن الصرف على ولاده..
الست ترفع قضايا نفقة وتقضى سنين عمرها فى المحاكم..
القانون يقولها اثبتى دخل الراجل
الست تقولهم مش عارفة! وانا ايه صلاحياتى عشان اثبته؟!!
بعد كام سنة فى المحاكم يتحكملها ب ٤٠٠ ج..
يقوم الراجل يمتنع عن الدفع..
الست تتمرمط عشان تحصلهم من بنك ناصر..
الراجل يتلاعب بالاوراق او يدعى انه بيصرف على امه وابوه او يروح يتجوز ويرفع تخفيض نفقة..
القاضى يخفض النفقة ل ٢٠٠ ج
الراجل يمتنع عن التنفيذ ويغير عنوانه..
القانون يقولها هاتيلنا عنوانه واحنا ننفذلك الحكم..
الست ماتعرفش تجيب عنوانه..
القانون يقولها مافيش حاجة فى ادينا..
ست تبيع اللى وراها واللى قدامها وست تروح تبيع كليتها وست تمضى وصولات امانة وتتسجن وست تتجوز عرفى وست تتجوز رسمى وتسيب ولادها وست تمشى فى الغلط وست تمد ايديها للى يسوى واللى مايسواش.
وفى الاخر العيال يتشردوا ويطلعوا كارهين العيشة واللى عايشينها.
وف كل الاحوال الست هى اللى وحشة و كخة وغلط و شريرة و مفترية وقادرة لا و الأجمد بقى القانون فى صفها!
و #كله_بالقانون
اقرأ أيضاً
مطالب المجلس القومي للمرأة بشأن قانون الأحوال الشخصية.. التفاصيل
