سهير جودة: الشخص المغامر في الخطأ يكون في عملية قمار غير محسوبة
قالت الإعلامية سهير جودة، إن الجميع يرتكب أخطاء بشكل مستمر، سواء مهنيا او عاطفيا او اقتصاديا، مشيرة أن هناك عقيدة تقول ان الانسان اذا ركب القطار الخطأ، لابد أن ينزل في أقرب محطة، لأنه كلما زادت المسافة زادت تكلفة الرجوع.
وأضافت سهير في برنامجها الذي يحمل اسم «الستات» والمذاع عبر فضائية «النهار»، قائلة: « الشخص اللي بيحب يغامر ويفضل مكمل في القطر ده كانه في عملية قمار غير محسوبة، بيراهن على الاشياء الغير ملموسة، وفي ناس عندها مبدأ الخسارة القريبة دائما أحسن من المكسب البعيد، والناس اللي بتعمل كده قصدها ان الخسارة تكون غير فادحة، وممكن انها تتلم».
واشارت سهير: «العلم بيقول ان انتي لازم يبقى عندك خطة جاهزة او بديلة، الخطة الجاهزة مهمة، ولازم يكون عندنا اكتر من خطة لأننا هنحتاجها، والاخطاء بنرتكبها بعدم وعي احيانا وحماقة».
وتابعت: «في استطلاع رأي امريكي بيقول ان في اربع قرارات غلط بياخدهم الشخص الامريكي في حياته، عندنا بناخد القرارت دي في اسبوع بس».
وأوضحت سهير: «في ناس بيبقى عندهم ٩٠٪ اخطاء و١٠٪ مميزات، طبعا ٩٠ ده رقم مفزع، لكن ١٠ ٪ ممكن تخليني اتحمل ال ٩٠٪ الاخطاء والعكس غير صحيح، والخسارة الاقتصادية صعبة لان في ناس تعبت وصرفت، ففي فكرة الخسارة المادية، ان كل ما تدفع اكتر كل ما فرصتك في الرجوع اصعب».
وأشارت: «المرونة النفسية هي انك تتقبل الهزيمة، وهي مش نهاية العالم، دي ممكن تبقى خطوة النجاح الحقيقية».
واوضحت سهير: انها كانت تقرأ خلال الايام الماضية في مذكرات رجل الاعمال رؤوف غبور الذي رحل من ايام، فقد كان يوصي ان كتابه لا يطبع الا بعد وفاته لكنه تراجع عن هذا القرار وتم طبعه قبل وفاته بشهرين تقريبا، قائلة: « لما قريت الكتاب لقيت الراجل ده بيطبق العلم من غير علم ، بس هو طبقه بتركيز وعقلية تجارية، ولو مصر فيها الف شخص زي رؤوف غبور وتركيبته الانسانية اكيد احوال كتير اقتصادية هتتغير، ده راجل حاول يغير مساره اكتر من مرة ، وفي احد المرات دخل السجن في لفته انسانية، فحياته مليئة بالتفاصيل، وتعتبر قصته حافز لكل من يتعرض للإخفاق في حياته، عليه ان يواصل الجهد من اجل تحقيق هدفه».
اقرأ أيضا: ايمن عامر لقاء الرئيس السيسي وبايدن يؤكد قوة ومكانة مصر أمام العالم
